Gereformeerde Kerk Linden

OMTRENT ONS

Die logo vertel ons storie en strategie

In 2005 is ŉ proses gevolg om ŉ nuwe logo vir die gemeente te vind wat die Drie Plus Twee Agenda moes voorstel. Die logo word hieronder kortliks verduidelik:

Die kleure: Pers simboliseer Koning Jesus en God Drie-enig, en dit herinner aan Jesus se kruisiging (Joh 19:2). Groen simboliseer lewe, groei en liefde, nuwe geleenthede en komplimenteer die dinamiese gestalte van die logo.

Die bewoording in pers dui op die kernsake van die gemeente se roeping, ons missie wat die Here vir ons gegee het. Die bewoording in groen is effens kleiner en ondergeskik aan die pers bewoording, want die leierskap en strukture is diensbaar aan die Groot Fokus, die Groot Gebod en die Groot Opdrag. "Structure follows strategy".

Die "kop" van die persoon is pers en dui op Christus wat die Hoof is van die gemeente, sy liggaam (1 Kor 12, 14; Ef 4), en dit vorm die middelpunt van die embleem. So word die fokus op Christus uitgebeeld (1 Kor 1:22-23; 2:2). Die persoon of gemeente (en elke lid van die gemeente) is met Christus, die Hoof verenig. So word die essensie van dissipelskap uitgebeeld, nl. om ŉ volgeling en leerling van Jesus te wees, en om onder die leiding van die Gees meer en meer aan sy beeld gelykvormig te word (2 Kor 3:18).

Die arms van die simbool herinner aan die kruis en daarmee aan Christus die Gekruisigde (1 Kor 2:2).

Die boog aan die regterkant spel die letter "C" vir Christus, en beklemtoon ook weer die Groot Fokus op Christus die gekruisigde.

Die boog wat die arms van die persoon vorm, wys na Bo en dui op lofprysing en aanbidding. So word die Groot Gebod treffend uitgebeeld: "jy moet die Here liefhê met jou hele hart, jou hele siel, jou hele verstand en al jou kragte" (Mark 12:30).

Die boog aan die linkerkant spel die letter "D" en staan vir dissipelskap en die Groot Opdrag om dissipels te maak (Matt 28:18-20). Let daarop dat hierdie die grootste boog is. Dit lyk soos die voete van die gemeente, wat in die wêreld die evangelie verkondig en in die werklikheid van elke dag lewensverandering bring (Ef 6:15).

Die vyf lyne onder die simbool vorm ŉ boek. Die gemeente se fondament is die Woord van God, die Woord van die kruis (1 Kor 1:18), en dit som terselfdertyd die strategie op as synde die Drie Plus Twee Agenda.
Die simbool is dinamies, beweeg en groei na Bo. Die figuur beweeg van die boek en met die boek in die wêreld in. Ook die woorde "meer ... meer ... meer" spel groei uit.